Félagsmál Velferðarráðuneytið vill svör frá stærstu sveitafélögum landsins, um stöðu biðlista, eftir félagslegu húsnæði, og hvort sveitarfélögin fullnægi lögboðnu hlutverki sínu.
Ráðuneytið vill upplýsingarnar fyrir 8. ágúst og vill þá skýr svör um hversu biðlistar eftir félagslegu húsnæði eru langir og hvort lögboðnu hlutverki sveitarfélaganna sé fullnægt samkvæmt lögboðnu hlutverki þeirra.
Ráðuneytið vill fá að vita hver heildarfjöldi umsókna um félagslegt leiguhúsnæði er og hversu lengi fólk hefur verið á biðlistum. Þá vill ráðuneytið fá svör um hversu mörgum umsóknum hefur verið hafnað, hversu mörgum félagslegum leiguíbúðum var úthlutað hjá hverju sveitarfélagi um sig og hver fjöldi einstaklinga og/eða fjölskyldna á biðlista eftir félagslegu húsnæði var 30. júní 2014.
Ráðuneytið vill enn fremur að sveitarfélögin upplýsi um fjölda einstaklinga og fjölskyldna sem þáði sérstakar húsaleigubætur hjá þeim, hver fjöldi félagslegra leiguíbúða í útleigu hafi verið 30. júní 2014 og loks spyr ráðuneytið hvort sveitarfélögin hafi uppi áætlanir um framboð á húsnæði og aðrar úrlausnir í húsnæðismálum þeirra sem ekki geta leyst þau sjálf.
Velferðarráðuneytið telur brýnt að fá skýr svör við þessum spurningum enda um mikið hagsmunamál að ræða sem varpa þarf ljósi á.
