Sósíalistar: Stóra húsnæðisbyltingin: 30 þúsund íbúðir á tíu árum

Sósíalistaflokkur Íslands leggur fram áætlun um byltingu í húsnæðismálum fyrir þingkosningarnar í haust. Áætlunin miðar að því að byggja 30 þúsund íbúðir á næstu tíu árum inn í afmarkað húsnæðiskerfi, varið fyrir verðsveiflum húsnæðis og fjármagnskostnaðar.

Fólk getur bæði leigt og keypt innan þessa kerfis. Það er opið öllum, þótt eðli málsins samkvæmt verði áherslan í upphafi á að koma þeim sem verst standa á húsnæðismarkaði í ódýrt og öruggt skjól. Leiguverð verður umtalsvert lægra en þekkist í dag, þar sem leigan mun greiða til baka byggingar-, fjármagns- og rekstrarkostnað á löngum líftíma íbúðanna. Þau sem vilja eiga íbúðirnar á móti Húsnæðissjóð almennings geta greitt kostnaðinn hraðar niður og eignast stærri hlut.

Byggingarkostnaður 30 þúsund íbúða er um 650 milljarðar króna eða um 65 milljarðar króna á ári. Verkefnið er fjármagnað með skuldabréfaútgáfu, framlagi ríkis- og sveitarfélaga á lóðum og með láni með ríkisábyrgð. Verkefnið mun því ekki kalla á nein framlög úr ríkissjóði, heldur mun leiga og afborganir standa undir verkefninu á líftíma húsanna.

Yfirstandandi húsnæðiskreppa, sem grafið hefur undan lífskjörum tug þúsunda fjölskyldna, er pólitísk stefna stjórnvalda. Þau hafa kosið að viðhalda skorti til að spenna upp húsnæðisverð með það að markmiði að hámarka gróða lóðabraskara, verktaka og stóru leigufélagana. Tilboð sósíalista til kjósenda er að afnema þessa grimmdarstefnu í húsnæðismálum og taka upp nýja stefnu sem byggir á samkennd, samhjálp, samvinnu og kærleika.

Að mati sósíalista munu kosningarnar í vor snúast um hvort alræði auðvaldsins fær að þróast hér áfram eða hvort almenningur tekur völdin og byggir upp réttlátt samfélag út frá eigin hagsmunum, vonum og væntingum.

Að þessu leyti er Sósíalistaflokkurinn sammála Alþýðusambandi Íslands, sem í gær kallaði eftir svörum stjórnmálaflokkanna um aðgerðir þeirra. Stóra húsnæðisbyltingin er fyrsta svar Sósíalistaflokksins til félaga Alþýðusambandsins.