Sólveig Anna Jónsdóttir hefur brugðist við sora Davíðs Oddssonar. Hann hefur ekki hikað að brúka stór og ljót orð um Sólveigu Önnu. Eitt er að gagnrýna, annað að vega að heiðri og æru fólks. Sólveig Anna skrifar:
„Ritstjóra Morgunblaðsins var brugðið, réttilega, þegar í Fréttablaðinu birtist fyrir nokkrum dögum leiðari þar sem aldrei þessu vant var ekki ausið yfir mig svívirðingum. Fyrrum Seðlabankastjóri og fínn maður að eilífu veit að svona lausung hjá Fréttablaðinu er slæm, lesendur verða að geta treyst því að í leiðurum þar sé ævinlega farið með rétt mál: Ég er ógeðslega innrætt meri, þjófur, galin og alls ekki of sterkt til orða tekið að kalla mig ógæfu þjóðarinnar. Á hvaða vegferð er fólk eiginlega þegar það er ekki einu sinni hægt að treysta því að leiðarar stærstu blaðanna fari rétt með, sérstaklega í svona alvarlegum málum?
En fyrrum forsætisráðherra hefur auðvitað aðgang að sínu eigin ritstjórnarplássi, guði sé lof fyrir það, og getur flýtt sér að minna á sannleikann og það sem mestu máli skiptir: Ef allt væri með felldu í lýðræðisríkinu Íslandi værum ég og mitt glæpaeðli í fangelsi. Við ættum ennþá eftir að sitja inni í ríflega 6 ár í viðbót ef dómarinn hefði aðeins haft smá hugrekki og ekki látið skrílinn hræða sig og dæmt eins og Lára V. Júlíusdóttir, sérstakur saksóknari vildi; í 16 ára fangelsi. Sem er nákvæmlega nógu löng fangelsisdvöl fyrir svona ógeðslegar manneskjur eins og mig og annað mótmælahyski. Börnin mín hefðu þá til dæmis ekki þurft að þola að búa með mér og börnin sem ég gætti á leikskólanum hefðu líka sloppið við þann hrylling að hafa mig hangandi yfir þeim hverja stund, skiptandi á bleyjum, gefandi að borða, svæfandi og svo framvegis. Aumingja litlu börnin. Allt þetta þurftu þau að þola bara vegna þess að dómarinn var svo mikill hugleysingi og skríllinn svo gasalega trylltur. Líkt og forðum var kveðið: Tremendously sad!“
