„Okkur tókst þetta og við erum búin að vinna sigur í þessum kosningum. Ég vil að við tökum smá tíma til að meðtaka það að eftir allt sem á hefur gengið, allan þann trylling sem á hefur gengið, þá tókst okkur að fá samþykki félagsfólks Eflingar fyrir því að við á Baráttulistanum eigum að fá að stýra efnahagslegri réttlætisbaráttu verka- og láglaunafólks á höfuðborgarsvæðinu,“ sagði Sólveig Anna í viðtali við Vísi eftir að hún og baráttufélagar hennar unnu sigur í formanns- og stjórnarkjöri Eflingar.
Sigur Sólveigar var afgerandi. Víst er að víða í launþegahreyfingunni er fólk sem er ósátt við endurkjör Sólveigar. Staðreyndin er sú að hún tekur aftur við formennsku í öðru stærsta félagi launafólks á Íslandi. Kosningabaráttan var hörð og nú er að bíða og sjá til hvernig andstæðingar Sólveigar Önnu, hér og þar í hreyfingunni, bregðast við.
