Mogginn lætur ekki af baráttunni gegn forystu Sjálfstæðisflokksins og orkupakkanum. Í dag tjaldar Davíð fram einsleitu sóknartríói. Skipað góðvinum hans og samherjum í langan tíma. Betur getur Davíð ekki boðið. Fremstur, að þessu sinni, fer séra Geir Waage í Reykholti, síðan kemur einn mesti og helsti skjólstæðingur Davíðs, Tómas Ingi Olrich og síðastur, en ekki endilega sístur, kemur Guðni Ágústsson frá Brúnastöðum.
Þeir þrír og Davíð tilheyra allir baby boom kynslóðinni. Komnir af léttasta skeiði. Þeir standa saman. Guðni virðist tala fyrir munn þeirra allra þegar hann skrifar: „Kæru forystumenn ríkisstjórnarinnar, Katrín, Bjarni og Sigurður Ingi! Þið hafið ekki enn sannfært kjarnann í ykkar flokkum um hvert þið eruð að fara og hvers vegna? Okkur mörgum finnst að ferðinni sé nú heitið út í buskann og þið séuð að skapa pólitíska óvissu fyrir Ísland og flokkana ykkar, okkar. Við óttumst að þessu fylgi enn alvarlegri afleiðingar því slík er andstaðan við þennan þriðja orkupakka að kannski fer ríkisstjórnin eins og allar hinar eftir hrun, beint út í fúamýri í kosningum eftir tvö ár, skaði en sjálfskaparvíti.“
Þeim þremur er ekki skemmt. Tómas Ingi, til að mynda, reynir að gera upp sakir við núverandi varaformann, Þórdísi Kolbrúnu R. Gylfadóttur, í einhverjum óljósum tilgangi. Geir Waage upplýsir að sjálfstæðisfólk á Vesturlandi hafi, á fundi þar, talað eigin þingmenn í þrot. Allir fundarmenn voru sem sagt ósammála forystu flokksins.
