Spurningin er hvort þessir einstaklingar hafi eitthvert erindi á þing eftir að hugarfar þeirra liggur ljóst fyrir, sem og iðrunarleysi þeirra.
„Ömurlegt er ofan á annað að verða nú vitni að skeiningum Klaustrara og illa fabrikkeraðri iðrun í fjölmiðlum. Ef sómakenndin væri fyrir hendi hefði þetta lið allt tekið pokann sinn fyrir löngu og skapað með því rými í samfélaginu fyrir gagnleg mál. En enn og aftur taka SDG og vinir hans allt plássið. Er nema von að margir séu orðnir þreyttir á þessu ástandi – eða svo talað sé mannamál: Komnir með æluna upp í kok.“
Þetta skrifar Björn Þorláksson blaðamaður eftir að hafa lesið grein Bergþórs Ólasonar.
Illugi Jökulsson er heldur ekki hrifinn. Hann skrifar:
„Orð Klausturþingmannanna voru ekki einungis „ósmekkleg“ eins og Bergþór reynir að sleppa hér með. Þau lýstu skoðunum og þó sérstaklega hugarfari þingmannanna sex. Spurningin er hvort þessir einstaklingar hafi eitthvert erindi á þing eftir að hugarfar þeirra liggur ljóst fyrir, sem og iðrunarleysi þeirra. Spurningin er líka hvort konur á þingi eigi að þurfa að vinna með manni sem ber þann hug til þeirra sem orð Bergþórs á Klaustri lýstu. Og raunar ekki bara konur, heldur þingmenn yfirleitt, tala nú ekki um kjósendur.“
