Ég er ekki að láta skattgreiðendur gera eitt eða neitt.
Þau tókust á í þingsalnum í gær, Helga Vala Helgadóttir og Bjarni Benediktsson.
Helga Vala: „Tölum um tölur. Hæstvirtur fjármálaráðherra lætur skattgreiðendur borga að óþörfu 230.000 kr. á sólarhring á bráðamóttöku Landspítala vegna þess að sjúklingar komast ekki á fullar eða lokaðar deildir á sjúkrahúsinu sem kosta 70.000 kr. á sólarhring. Hæstvirtur fjármálaráðherra lætur skattgreiðendur borga að óþörfu 230.000 kr. á sólarhring fyrir sjúklinga á bráðamóttöku Landspítala í Fossvogi í stað þess að borga 40.000 kr. fyrir sólarhringinn á öldrunarheimilum. Hæstvirtur fjármálaráðherra lætur skattgreiðendur borga að óþörfu ferða- og dvalarkostnað fyrir íbúa landsbyggðarinnar sem ekki geta sótt grunnheilbrigðisþjónustu í heimabyggð og færir þá á Landspítala sem er algjörlega yfirfullur. Þrátt fyrir að við séum mögulega ekki sammála um margt, hæstvirtur fjármálaráðherra, getum við ekki verið sammála um að þetta sé afskaplega óskynsamleg ráðstöfun á skattfé landsmanna?“
Bjarni Ben: „Ég er ekki að láta skattgreiðendur gera eitt eða neitt. Ég hef stutt hvern heilbrigðisráðherrann á fætur öðrum í ýmiss konar átaksverkefnum, m.a. ætla ég að vísa til þess að fyrir nokkrum árum létum við opna Vífilsstaðaspítala að nýju til að létta á Landspítalanum svo að hann yrði ekki stíflaður vegna mikils þrýstings á bráðamóttökunni. En þrátt fyrir ýmiss konar átaksverkefni lendir bráðadeildin ítrekað í vanda. Sá málaflokkur, virðulegi þingmaður, er hjá fagráðherra. Það er ágætt hjá háttvirtum þingmanni að taka þessa umræðu upp við hæstvirtan heilbrigðisráðherra. Ég bendi hins vegar á að ég hef verið talsmaður blandaðra lausna í íslenskri heilbrigðisþjónustu. Ég hef talað fyrir því að við ættum að berjast gegn hvers kyns sóun í kerfinu, að við ættum að nýta sveigjanleika einkaframtaksins en fleiri raddir í þingsal hafa talað gegn einkaframtakinu, jafnvel þegar augljóst er á öllum tölum að það gæti leitt til sparnaðar fyrir skattgreiðendur sem háttvirtur þingmaður er skyndilega orðinn talsmaður fyrir. Það er eitthvað nýtt frá Samfylkingunni.“
