Menntamál Hvað kostar að skrá stúdenta til náms í Háskóla Íslands? Hvers vegna kostar 625 prósentum meira að skrá inn nemenda í Háskólann en til að mynda í Menntaskólann við Hamrahlíð?
Í þessa veru spyr Ísak Einar Rúnarsson, formaður Stúdentaráðs Háskóla Íslands, í grein sem birt er í Fréttablaðinu í dag.
Hann skrifar: „Reiknað er með að tekjur HÍ af skrásetningu nemenda verði heill milljarður; þúsund milljónir.“ Og vekur athygli á að fyrir þremur árum var skrásetningargjaldið ekki nema 45.000 krónur.
„Í ár var gjaldið hækkað upp í 75.000 krónur en skorið var niður í fjárframlögum til HÍ á móti. Hvert rennur svo skrásetningargjaldið? Jú, stór hluti skrásetningargjaldsins fer í rekstur kennslusviðs og deildarskrifstofa, kostnað af aðstöðu og stjórnun ásamt skipulagningu kennslu og prófa. Þessir liðir eru ekki annað en almennur rekstrarkostnaður skólans og því verður að draga þá ályktun að í raun sé gjaldið skólagjald en ekki skrásetningargjald.“
