Sunnudaginn 23. nóvember, kl. 15-17, stendur Ungmennaráð UNICEF fyrir skiptimarkaði barna með leikföng, spil, bækur og annað í aðalsafni, Tryggvagötu 15.
Á vef Bókasafns Reykjavíkur kemur fram að markaðurinn muni ganga þannig fyrir sig að börnum er boðið að koma á markaðinn með leikföng, bækur og spil sem þau eru hætt að leika sér með, leggja þau inn í leikfangasafn ungmennaráðsins og velja sér önnur leikföng í staðinn. Börnin fá fræðslu um endurnýtingu, sjálfbærni og Barnasáttmála Sameinuðu þjóðanna.
Leikur sameinar öll börn, hvar sem þau kunna að búa og þjónar mikilvægu hlutverki í þroska hvers einstaklings. Með skiptidótamarkaðnum vill ungmennaráð UNICEF skapa vettvang þar sem börn fá tækifæri til að leika sér um leið og þeim er gefið tækifæri til að læra um umhverfi sitt og samfélag.
