Skattlagning er góð fjárfesting
- sagði Logi Einarsson þegar hann talaði um fjármálaáætlunina. Hann gaf bókinni eina stjörnu
„Hér er stutt bókagagnrýni,“ sagði Logi Einarsson, formaður Samfylkingarinnar. „Út er komin fjármálaáætlun. Höfundur hennar er Benedikt Jóhannesson, hæstv. fjármálaráðherra. Bókin er 363 síður, snoturlega uppsett og í þokkalegu bandi. Innihaldið orkar meira tvímælis. Á blaðsíðu tólf 12 segir, með leyfi forseta: „Stjórnvöld bera þá ábyrgð að velja milli skammtímahagsmuna og langtímahagsmuna, uppbyggingar og sparnaðar, skattlagningar og frelsis.“
Skammtímasjónarmið eru andstaða langtímasjónarmiða
„Óljóst er þó hvaðan sú hugmynd kemur að skattlagning sé andstaða frelsis,“ sagði Logi. „Þvert á móti er skattgreiðsla besta fjárfesting flestra einstaklinga á ævinni. Hún tryggir þorra almennings áhyggjulítið og innihaldsríkt líf, en þó gæti sanngjarnari skattlagning tryggt öllum ókeypis skólagöngu, ódýrari heilbrigðisþjónustu, áhyggjulaust ævikvöld og margt annað. Án samneyslunnar væru við líka illa varin fyrir stórum áföllum sem henda okkur flest yfir ævina. Þá birtist í henni það fallegasta í lífinu, samkennd og samhjálp. Það er líka röng ályktun að uppbygging sé endilega andstaða sparnaðar. Raunar má leiða líkur að því að uppbygging á grotnandi innviðum, veiku heilbrigðiskerfi og vanfjármögnuðu skólakerfi leiði til mikils sparnaðar þegar fram í sækir. Það er hins vegar hárrétt hjá höfundi að skammtímasjónarmið eru andstaða langtímasjónarmiða. Það eru skammtímasjónarmið að sækja ekki meiri tekjur til þeirra sem nýta auðlindirnar og hinna sem eru mjög vel aflögufærir. Þá eru það hagstjórnarmistök að lækka virðisaukaskatt og auka einkaneyslu á þenslutímum. Þannig glatast 13 milljarðar úr ríkissjóði sem nýttust til að styrkja almannaþjónustu á brauðfótum og tryggja félagslegan stöðugleika.“
Benedikt hefur gefið út betri bækur
„Þetta eru ákveðin vonbrigði því að höfundur hefur oft gefið út betur heppnaðar bækur og tímarit. Bókin endar illa. Hún er fráleitt uppskrift að meira frelsi fyrir almenning, boðar ekki nauðsynlega uppbyggingu og verður okkur dýrkeypt í framtíðinni. Loks byggir hún á skammtímasjónarmiðum. Frú forseti. Ég gef bókinni eina stjörnu.“
