Ég hvet ríkisstjórnina til góðra verka í þessum málum.
„Uppi er mjög áhugaverð staða meðal samningsaðila á vinnumarkaði sem skorað hafa á stjórnvöld að lækka skatta, og það með fjármálaráðherra úr Sjálfstæðisflokki, sem alla jafna vill lækka skatta, og forsætisráðherra úr Vinstri grænum, sem ég held að væri alveg til í að lækka skatta á láglaunafólk, eins og er krafan almennt. Þetta hljómar mjög gerlegt. En tillögur samkvæmt fjármálaáætlun líta þó eiginlega þveröfugt út. Þar kemur skattalækkunin aðallega til góða fyrir þá sem eru með milli- og hátekjur. Öll skattaívilnun kemur í rauninni þeim til góða,“ sagði Björn Leví á Alþingi í dag.
„Ég hvet ríkisstjórnina til góðra verka í þessum málum. Verið hefur nokkur jarðskjálfti á íslenskum vinnumarkaði á undanförnum árum síðan kjararáð kom með innlegg sitt í þessa fyrstu bylgju kjaramála. Þá bylgju höfum við ekki enn náð að jafna. Við erum enn þá að sigla í gegnum þann storm. Það verður áhugavert að sjá hvaða niðurstöðu við náum í því efni með þessari áskorun aðila vinnumarkaðarins til stjórnvalda.
Ég ætla að vera hóflega bjartsýnn hvað það varðar, hóflega af því að ég sé þess ekki merki í fjármálaáætluninni þar sem tvímælalaust hefði verið tækifæri til að leggja þessar áherslur. En það var ekki gert og ég skil ekki af hverju. Þess vegna vakti það ákveðna bjartsýni að sjá þessa niðurstöðu í morgun. En framvindan er á herðum ríkisstjórnarinnar.“
