STJÓRNMÁL Sigmundur Davíð Gunnlaugsson spurði Steingrím J. Sigfússon í svari við fyrirspurn Steingríms um arðgreiðslur tryggingafélaganna.
Forsætisráðherra spurði: „Hver er afstaða háttvirts þingmanns, fyrrverandi fjármálaráðherra, til þessa og áhrifa ákvarðana hans og síðustu ríkisstjórnar og þess hvernig þau stóðu að verki þegar þau tóku í rauninni yfir þennan markað að miklu leyti, endurreistu hann og bjuggu til regluverkið sem hinn nýi endurreisti markaður átti að starfa eftir og þetta er afleiðingin? Telur háttvirtur þingmaður að hann geti bent okkur á eitthvað sem hefði mátt betur fara þegar hann var að endurreisa þennan markað, sem getur þá nýst okkur til þess að fást við þetta?“
„…hvort það hafi verið mistök að láta ekki tryggingafélagið Sjóvá fara á hausinn þá er ég ekki þeirrar skoðunar,“ svaraði Steingrímur. „Ég bið menn að hugleiða hvað það hefði þýtt fyrir tugþúsundir viðskiptavina þess fyrirtækis sem hefðu misst sínar ógreiddu slysa- og örorkubætur, sem hefðu vaknað upp einn daginn á fyrri hluta árs ótryggðir þrátt fyrir að hafa borgað iðgjöld, tugmilljarða skellur sem að allra mati sem að málinu komu hefðu valdið miklu meira tjóni en þó kostaði að aðstoða félagið. Það er ekki sanngjarnt að skella skuldinni af núverandi arðgreiðslum félaganna sem allar hafa komið til á þessu kjörtímabili, vel að merkja, á þá aðgerð. Ríkið kom ekki að nema einu tryggingafélagi, það voru bankar og aðrir slíkir aðilar sem komu þá að einhverju leyti að fjárhagslegri endurskipulagningu annarra félaga. Ég er að spyrja í núinu og í nútímanum. Ef hæstvirtur forsætisráðherra vill áfram vera á fyrra kjörtímabili þá er það hans val,“ sagði Steingrímur J. Sigfússon.
