Sólveig Anna skrifaði í gærkvöld:
„Nokkur orð fyrir svefninn. Á morgun hefst atkvæðagreiðsla hjá Samtökum atvinnulífsins um ólöglega uppsögn kjarasamninga við meira en 120 þúsund manneskjur á íslenskum vinnumarkaði. Um er að ræða sjónarspil utan um fjárkúgun úr sjóðum hins opinbera. Uppsögn samninga verður ekki samþykkt í þessari atkvæðagreiðslu, enda stóð aldrei til af hálfu SA að segja upp samningunum. En atburðarásin verður án efa sú að á morgun mun ríkisstjórnin beygja sig fyrir hinum háu herrum og reiða fram einhverja gjöf til þeirra. Hún verður greidd af okkur, vinnandi fólki þessa lands, skattgreiðendum þessa lands. Við höfum fylgst með formönnum stjórnarflokkanna taka við hótunum SA og bugta sig fyrir þeim athugasemdalaust, látandi eins og þau skilji ekki að það er verið að fjárkúga þau, í versta falli eilítið krumpuð í framan af skömm. Allir sjá fyrir hverja þau vinna. Ég vona að við getum hjálpað hvort öðru að muna þetta þegar við stöndum við kjörkassana að ári.“