Uppsetning og leikgerð á Sjálfstæðu fólki verður rædd á Gljúfrasteini á sunnudaginn kl. 16, ásamt bókinni sjálfri. Tilefnið er Dagur íslenskrar tungu. Atli Rafn Sigurðarson og Ólafur Egill Egilsson koma í hús skáldsins, ræða málin og spjalla við gesti.
Atli Rafn, Ólafur Egill og Símon Birgisson eru höfundar leikgerðar en verkið verður frumsýnt í Þjóðleikhúsinu þann 26. desember.
Sjálfstætt fólk er ein ástsælasta skáldsaga íslenskra bókmennta fyrr og síðar. Það verður fróðlegt að heyra hvernig tekist verður á við þetta magnaða verk Halldórs Laxness, þar sem farið er með okkur í einstakt ferðalag um sögu þjóðarinnar.
Atli Rafn leikur Bjart í Sumarhúsum og Ólafur Egill bregður sér í gervi kennara í sýningunni.
Allir eru velkomnir á meðan húsrúm leyfir og aðgangur er ókeypis.
