Lilja Dögg Alfreðsdóttir er bæði menntamálaráðherra og varaformaður Framsóknarflokksins. Það dugar ekki til að hún komi í gegnum Sjálfstæðisflokkinn lögum um styrk til fjölmiðla. Ástæðan? Sjálfstæðisflokkur vill að styrkir til fjölmiðla verði aðeins veittir til eins árs. En hvers vegna?
Einmitt, til að fjölmiðlar verði að banka upp á hjá þingheimi og ríkisstjórn á hverju ári. Með því tekst þeim að koma böndum á þá fjölmiðla sem ekki eru þegar í hallelújakórnum. Sjallarnir eru snjallastir þegar þeir reisa varnarveggi um eigin verk, gerðir og hugsanir.
Skipuð var sérstök nefnd stjórnarflokkanna um fjölmiðlakrísuna. Silja Dögg Gunnarsdóttir Framsókn er formaður og með henni í nefndinni eru fjölmiðlamennirnir fyrrverandi Páll Magnússon og Kolbeinn Óttarsson Proppé.
Í Fréttablaðinu í dag má lesa úr frétt um málið og þar sést hversu langt er í land. Búið er að þæfa málið og koma því í óleysanlegan rembihnút. Hér er smásýnishorn:
„Skýra þurfi aðferðafræði styrkjanna til að tryggja betur að þeir hafi jákvæð áhrif á fjölbreytni og fjölræði á fjölmiðlamarkaði. Sömuleiðis þurfi að huga að stöðu smærri fjölmiðla. Er lagt til að þessir þættir verði teknir til nánari skoðunar áður en um varanlegt styrkjakerfi verði að ræða.“
Þetta mál er sýnilega í þeim farvegi sem sumum þingmönnum hugnast best.
Án þess að það skipti nokkru máli mun Miðjan alls ekki sækjast eftir ríkisstyrk. Verum minnug þess að hádegisverðurinn er aldrei ókeypis. Sú leið að fjölmiðlar þurfi að banka upp á hverju ári til að sækjast eftir ríkisstyrkjum ákveðnum af stjórnmálamönnum er galið.
-sme
