Sjálfstæðisflokkur beinir kastljósinu að vanda Katrínar í stjórnarskrármálinu

Katrín Jakobsdóttir forsætisráðherra er nokkuð einangruð hvað varðar vilja hennar til breytinga á stjórnarskránni.

Birgir Ármannsson, þingflokksformaður Sjálfstæðisflokks, gerði Katrínu þann óleik að hefja umræðu á Alþingi um stöðu stjórnarskrárbreytinganna. Þar kom fram mikil mótstaða við vilja forsætisráðherra.

Birgir er kurteis og orðvar maður. Hann sagði samt þetta:

…stærra en hefðbundin dægurpólitík…

„Ég hef verið þeirrar skoðunar að það væri miklu vitrænni vinnuaðferð við þau mál en að ætla sér að breyta öllu í einu, borða fílinn í einum munnbita eins og stundum hefur verið lagt til hér á þingi og annars staðar. Ég hef verið þeirrar skoðunar að vinnulagið væri að því leyti skynsamlegt og í réttum farvegi.“

Talsmenn annarra flokka voru herskárri. Katrín brást við hinni hörðu gagnrýni og sagði: „Ég ætla að leyfa mér að taka upphrópanir, eins og pólitísk hrossakaup, sýndarsamráð, leikþáttur og aðrar upphrópanir af þeim toga, og láta þær liggja. Ég ætla bara að leyfa þessu að liggja því að mér finnst þetta mál ekki eiga skilið svona umræðu. Þetta mál er svo miklu stærra en hefðbundin dægurpólitík, miklu stærra en sú sem hér stendur og miklu stærra en við öll og það er löngu kominn tími til að við leyfum okkur að taka efnislega afstöðu.“

Með umræðunni tókst Sjálfstæðisflokki að sýna ótvírætt hversu slæm staða Katrínar er í stjórnarskrármálinu.