Simmi Vill hefur þekkt Ingó Veðurguð lengi: „Ef Öfga-hópurinn líkar ekki skoðun mína á málinu“
Þúsundþjalasmiðurinn Sigmar Vilhjálmsson, betur þekktur sem Simmi Vill, segir meiðyrðamál Ingólfs Þórarinssonar, betur þekktur sem Ingó Veðurguð, hollt fyrir íslenskt samfélag. Niðurstaða dómsmálsins eigi eftir að segja þegnunum hvað má og hvað má ekki.
Simmi tjáði sig um málefni Ingó Veðurguðs í hlaðvarpinu 70 mínútur, ásamt Huga Halldórssyni. Báðir þekkja þeir Ingó en ítrekuðu að þær væru að reyna að tjá sig með hlutlausum augum. Simmi viðurkennir að hann væri hræddur að tjá sig um málið, því það gæti farið illa í suma.
Sjá einnig: Edda Falak birtir kæru á hendur Ingó Veðurguð: „Ég mun berjast þar til ég dey“
„Ég er búinn að þekkja Ingó lengi. Það þýðir ekki að ég viti hvað hann geri eða hvort hann geri eitthvað. En þú getur ekki tekið afstöðu þó þú þekkir einhvern. Þú veist ekkert hvað fólk gerir. Þess vegna er ég ekki að taka afstöðu þar. En hins vegar átta ég mig á því að við erum að fara inn í umræðu hérna þar sem ég segi eitthvað sem að Öfga-hópurinn, ef við tökum hann sem dæmi, líkar ekki skoðun mína á málinu hlutlaust. Því ég er að reyna að horfa á þetta hlutlaust. Og ef ég segi eitthvað, og mér verður fótaskortur á tungunni hér á eftir, og þeim mislíkar hvað ég segi þá gætu þær allt eins farið í herferð gegn mér, gegn veitingastöðunum mínum og ógnað þar með rekstri þeirra og starfsmönnum mínum. Þannig ég ber rosa mikla ábyrgð,“ segir Simmi og heldur áfram:
„Þetta dómsmál snýst um það hvort það megi tala svona um aðra í nafni málfrelsis, eða ekki. Er þetta orðið ærumeiðandi eða ekki? Lögin munu taka á því.“ sagði hann og bætti við: „Ég segi: Þetta dómsmál er dýrmætt fyrir okkur sem samfélag. Því annaðhvort er þetta í lagi, eða þetta er ekki í lagi. Og hvor niðurstaðan sem verður er holl fyrir okkur sem samfélag að vita hvort þetta megi eða megi ekki.“