Guðmundur Auðunsson skrifar:
Látum Sigurð Inga og vini hans ekki svindla á okkur Sunnlendingum.
Samgönguráðherra og þingmaður Suðurkjördæmis, Sigurður Ingi Jóhannsson, kemur nú fram í fjölmiðlum og montar sig af því að nú sé nýja Ölfusárbrúin loksins að komast á koppinn. Einkennilegt að þetta gerist rétt fyrir kosningar og lofar ráðherrann að brúin verði tilbúin 2023 eða 2024. Nú er auðvitað kominn tími á þessa brú og Sunnlendingar, sérstaklega Selfyssingar löngu orðnir þreyttir á flöskuhálsinum við gömlu brúna yfir ána. En auðvaldið lætur aldrei fram hjá sér fara tækifæri til að græða á kostnað almennings. Sigurður ætlar nefnilega að rukka vegfarendur fyrir að nota brúna. Hvers vegna í ósköpunum? Jú, vegna þess að ríkisstjórnin ætlar nefnilega að fjármagna brúna með einkafjármagni og láta síðan fjárfestana græða á íbúunum. Hér nefnir Sigurður til sögunnar svokallaða „samvinnuleiðarverkefni“ eða PPP. Þessi skammstöfun stendur fyrir Public Private Partnership sem er fyrirbæri sem Tony Blair, skoðanabróðir Samfylkingarinnar í Bretlandi, fann upp. Það er löngu búið að afhjúpa þetta sem svikamyllu, í raun áskrift að peningum almennings tryggða af ríkinu. Bretar skammast sín nú svo fyrir þetta að þeir eru hættir að notast við þessa fjármögnunarleið eftir að reiknað var út að PPP hafi kostað breska skattborgara hundruð milljarða punda aukalega miðað við venjulega opinbera fjármögnun.
PPP svikamillan
Hvernig virkar þetta PPP fyrirbæri. Jú, þetta felst í því að einkaaðilar fjármagna ákveðnar nauðsynlegar ríkisframkvæmdir gegn greiðslu, annað hvort frá skattborgurum eða frá notendum almannaþjónustunnar eins og í þessu tilfelli. Brúin mun kosta um sex og hálfan milljarð. Það er venjulega tekið að láni og greitt til baka yfir nokkurn árafjölda. Hvort haldið þið að það sé ódýrara fyrir einkaaðila eða ríkið í gegnum vegagerðina að taka slík lán? Augljóslega ríkið, sem hefur aðgang að sérstaklega ódýrum lánskjörum í dag. Til viðbótar gera fjárfestingaraðilar kröfu um a.m.k. 20% arðsemiskröfu á fjárfestingu sína til að borga sjálfum sér arð. Einkaþoturnar kaupa sig ekki sjálfar. Það er því augljóst að verið er að svindla á almenningi í gegnum PPP fjármögnun. Miklu einfaldara og ódýrara að fjármagna slíkar framkvæmdir í gegnum skattakerfið. Látum Sigurð Inga og vini hans ekki svindla á okkur Sunnlendingum.
Sósíalistar hafna einkaframkvæmdum í almannaþjónustu
Einkafjármögnun opinberra framkvæmda er ekki bara miklu dýrari en opinber fjármögnun, hún er einfaldlega áskrift á ofsagróða auðmanna, tryggðan af ríkinu. Sósíalistar aldrei sætta sig við slíkt svindl. Og þú getur líka sagt nei við svindlinu og spillingunni og kosið J-lista Sósíalista í kosningunum 25. september.
Höfundur skipar fyrsta sæti á J-lista Sósíalistaflokks Íslands í Suðurkjördæmi.