Frá og með morgundeginum er „enginn sýslumaður í Vestmannaeyjum“ – eins og var meginefni ræðu minnar.
Páll Magnússon skrifar:
Það er sérkennilegt að sjá dómsmálaráðherra í þessari frétt byrja á því að að staðhæfa ranglega að ég hafi haldið því fram að búið væri að leggja niður sýslumannsembættið í Vestmannaeyjum – og segja síðan að það sé rangt hjá mér. Þessu hélt ég aldrei fram. Ég sagði í ræðu minni „…að frá og með föstudeginum næsta, ekki á morgun heldur hinn, yrði enginn sýslumaður í Vestmannaeyjum“. Og það er rétt. Enda kemur það fram í tilkynningunni frá ráðuneytinu sjálfu – eins og reyndar önnur efnisatriði ræðunnar – sem ráðherrann segir svo af hæversku sinni að sé „…allt meira og minna rangt“.
Það er reyndar líka sérkennilegt að sjá í athugasemd ráðuneytisins þessa staðhæfingu: „Enginn starfsmaður dómsmálaráðuneytisins fór til Vestmannaeyja í embættiserindum vegna breytinga á yfirstjórn hjá sýslumannsembættinu í Vestmannaeyjum“. Hinn ágæti sýslumaður á Suðurlandi fór einmitt til Vestmannaeyja þennan tiltekna dag af þessum ástæðum. En ráðuneytið lítur kannski ekki á sýslumanninn sem „starfsmann“ sinn – og það kann að vera rétt að formi til.
Eftir stendur aðalatriði málsins: Frá og með morgundeginum er „enginn sýslumaður í Vestmannaeyjum“ – eins og var meginefni ræðu minnar.
