Steingrími J. Sigfússyni sást yfir eitt atriði, hið minnsta, þegar hann barðist hvað harðast fyrir iðjuverinu á Bakka við Húsavík. Steingrímur mundi vel eftir að færa iðjuhöldunum jarðgöng, göng sem eru svo sannarlega af skornum skammti í landinu, en hann gleymdi sem sagt einu. Viðhaldi og rekstri ganganna. Sem kostar 25 milljónir á ári.
Þar fór í verra. Auðvelt er að ímynda sér að búið sé að hringja í Steingrím og biðja hann að redda þessu. Enn hefur Steingrímur enga lausn fundið, eftir því best er vitað.
Öll spjót beinast að Vegagerðinni. Að hún annist viðhaldið og reksturinn. Peningarnir verði sem sagt teknir úr öðrum framkvæmdum Vegagerðarinnar og færðir til „Steingrímsganga“.
Sigurður Ingi, sem fyrir kosningar sagði að það þyrfti ekki að hækka skatta, en vill ólmur í dag hækka skatta eða setja á nýja, hlýtur að benda Steingrími á að hægt sé að setja vegagjöld í „Steingrímsgöngum“.
En kannski má ekki gera kolabrennsluiðjuverinu að borga eins og undirúið er að við hin þurfum að borga, nánast hvert sem leið okkar kann að liggja.
Það er munur að eiga réttu vinina.
