Íslandsmót í lýðskrumi, og upprunavottorð Viðreisnar og Samherjabikarinn
Fyrrum samherjarnir, Bjarni Benediktsson og Þorgerður Katrín Gunnarsdóttir, formenn systraflokkanna, Sjálfstæðisflokks og Viðreisnar, heyja nú harða keppni um hvor flokkanna er meiri lýðskrumaflokkur. Ekki má á milli sjá hor flokkurinn er nær settu marki
Einhverjir kunna að segja að hvorugur flokkinn eigi hinn minnsta möguleiki til að ná titlinum. Hann sé í höndum Miðaldaflokks Sigmundar Davíðs og Gunnar Braga. Keppt er um Samherjabikarinn.
Baráttutækni beggja er sýnilega. Að tala oft í öfugmælum. Spennandi form. Enda er barist um hvort eða hvort ekki verði gerð samantekt á því sem Samherji borgar fyrir veiðirétt og svo veiðirétt við Namibíu.
Þorgerður á fyrsta leik:
„Það hlýtur því að vera eðlilegt að spyrja sig að því hver það er á endanum sem er raunverulega að grafa undan lýðræðinu? Er það sá sem biður um einfaldar upplýsingar er varðar almannahag og gætu varpað mikilvægu ljósi á stjórn fiskveiða í landinu, eða sá sem gerir hvað sem er til þess að grafa undan upplýsingagjöf?“
Þorgerður Katrín spilar enn djarft og segir: ,,Það er nefnilega merkilegt ef satt reynist að íslensk sjávarútvegsfyrirtæki séu tilbúin til að greiða meira fyrir tímabundinn afnotarétt til eins árs í Namibíu fyrir veiðirétt en það sem fyrirtækin treysta sér til að greiða fyrir ótímabundinn afnotarétt á Íslandi.“
Bjarni svarar:
„Þeir sem standa að þessari tillögu láta sem allir þessir þættir séu sambærilegir og hér þurfi bara að svara spurningunni um það hvað sé borgað fyrir að veiða fisk hér annars vegar og í Namibíu hins vegar.
Eða er ekki fiskur bara fiskur?
Nei, augljóslega ekki. Og þau vita það. En þegar athygli er vakin á lýðskruminu eiga þau engan annan leik en að ganga lengra og hrópa: Sérhagsmunagæsla!“
Svo kýlir Bjarni beint í kvið systurflokksins, Viðreisnar og birtir upprunavottorð Viðreisnar, en gleymir samt fæðingarheimilinu, Valhöll við Háaleitisbraut.
„Það gera þau í einum kór, þingmenn Viðreisnar. Þorsteinn Víglundsson, fyrrverandi framkvæmdastjóri Samáls, stjórnarmaður Samtaka iðnaðarins og framkvæmdastjóri Samtaka atvinnulífsins, Jón Steindór Valdimarsson, fv. samstarfsmaður Þorsteins hjá Samtökum iðnaðarins og framkvæmdastjóri þar, og Þorgerður Katrín, formaður, sem kom í pólitíkina aftur beint af skrifstofu Samtaka atvinnulífsins.“
Nú er beðið eftir næsta kafla. Annars fær Sigmundur Davíð Samherjabikarinn fyrir lýðskrum.
Áfram Bjarni. Áfram Þorgerður Katrín.
-sme
