Seljum Flugstöð Leifs Eiríkssonar
- sá er vilji Óla Björns Kárasona, formanns efnahags- og viðskiptanefndar Alþingis
Óli Björn Kárason alþingismaður vill að ríkið selji Flugstöð Leifs Eiríkssonar. Þetta má lesa í vikulegri grein hans í Morgunblaðinu í dag..
„Selja á flugstöðina og nýta þá fjármuni sem losna til að ráðast í nauðsynlegar framkvæmdir í samgöngum, í vegi, brýr, göng, hafnir og innanlandsflugvelli,“ skrifar Óli Björn.
Hann segir að með sölunni losi ríkissjóður tugi milljarða sem eyrnamerktir verði umbótum og uppbyggingu í samgöngum um allt land. „Þessir fjármunir bætast við það sem ætlað er til árlegrar fjárfestingar í samgöngum á komandi árum samkvæmt fjármálaáætlun, þar á meðal smíði nýrrar Vestmannaeyjaferju og Dýrafjarðargöng.“
Óli Björn segist sannfærður um að hagsmunum almennings og fyrirtækja sé betur borgið með því að nýta fjármuni í umfangsmiklar umbætur í samgöngum en að binda þá í flugstöð, sem aðrir en ríkið eru betur færir um að reka.
