„Stjórinn í Reykjavíkurborg safnar í klúbbinn alls konar jaðarfólki sem enginn annar myndi fela ábyrgðarstörf,“ segir í einstakri grein sem Brynjar Níelsson skrifar. Kannski er þetta upphaf baráttu hans í oddvitasæti flokksins í borgarstjórnarkosningunum.
Síðan kemur „greining“ Brynjars á framkvæmdum í borginni.
„Allar framkvæmdir á vegum borgarinnar snúast um að þrengja götur svo enginn komist ferða sinna með góðu móti og planta rándýrum stráum og pálmatrjám hist og her um borgina. Þar sem ekki er hægt að þrengja götur meira eru sett upp gangbrautarljós með hundrað metra millibili til að tefja umferðina enn meira. Og til að bæta um betur er umferðarhraði lækkaður niður í gönguhraða.“
Í lok greinarinnar er svo kafli sem hefði betur verið í upphafi greinarinnar. Þá hefðum við lesendur verið varaðir við fyrir fram en ekki eftir á.
„Þessi pistill er kannski ekki að öllu leyti sanngjarn gagnvart stjórunum í Reykjavík. Hann ber þess merki að vera skrifaður af úrillum, sjálfhverfum og tapsárum manni, sem hafnað var af stuðningsmönnum Reykjavíkur. Kannski er samt heilmikill sannleikur í þessu hjá kallinum.“
Þetta er nú meira kálið.
