Það er engin ástæða til að hlusta á þetta dæmalausa bull í formanni fjárlaganefndar.
„Það var ótrúlegt að hlusta á formann fjárlaganefndar í Kastljósi í kvöld þar sem hann hneykslast á mér fyrir að hafa rætt opinberlega breytingartillögur frá ríkisstjórninni á fjármálaáætluninni. Talaði formaðurinn um að trúnaður hefði verið á þessum tillögum. Það er bara alls ekki rétt og í raun helber ósannindi,“ segir Ágúst Ólafur Ágústsson, þingmaður Samfylkingarinnar á Facebook.
„Enda hefði það verið fáránlegt að trúnaður hefði verið á breytingartillögum ríkisstjórnarinnar á fjármálaáætlun sem snertir sérhvern einstakling í landinu,“ segir hann.
„Í huga formanns fjárlaganefndar áttu þetta kannski að vera leynitillögur enda átti að afgreiða þær á 2 dögum og formaðurinn hefur vitað að tillögurnar myndu illa þola skoðun.
Þetta voru hins vegar samþykktar tillögur ríkisstjórnar Íslands kynntar í fjárlaganefnd Alþingis þar sem óskað var eftir að farið yrði eftir þeim. Og í þeim tillögum kom fram mikill niðurskurður frá því sem hafði verið boðað í þeirra eigin áætlun sem hafði verið lögð fram einungis 2 mánuðum áður. Þarna áttu öryrkjar, framhaldsskólar, nýsköpun, umhverfismál, þróunarsamvinna, sjúkrahús og heilsugæsla að fá mestu lækkunina á milli umræðna.
Ég vil bara fullyrða að vegna þess að við gagnrýndum strax þessar breytingartillögur ríkisstjórnarinnar opinberlega og fengum stuðning hagsmunahópa öryrkja í þeirri gagnrýni, að okkur tókst að minnka niðurskurðinn milli umræðna um heila 15 milljarða kr.
Enn er margt vont í breytingartillögum fjárlaganefndarinnar og áfram munum við berjast gegn þeim eins og Logi Einarsson réttilega benti svo vel á í Kastljósviðtalinu.
Í tillögum sínum er meirihluti fjárlaganefndar að leggja til að Alþingi „lækki“ þá fjármuni sem áttu að renna til öryrkja, framhaldsskóla, umhverfismála, nýsköpunar o.s.frv. frá því sem hafði verið lofað og kynnt. Þau vilja beinlínis láta minni fjármuni renna til þessara aðila heldur en til stóð, fyrir einungis rúmum 2 mánuðum, og það er niðurskurður í meðförum þingsins og milli 1. og 2. umræðu málsins.
En það er engin ástæða til að hlusta á þetta dæmalausa bull í formanni fjárlaganefndar um að niðurskurður þýði aukning eða opinberar tillögur ríkisstjórnarinnar eigi allt í einu að vera einhverjar leynitillögur þótt vondar séu.“
