„Við höfum séð, rannsóknir hafa farið fram á því, ekki hvað síst í Finnlandi, að lækkun á matvælum til verslunarinnar skilar sér ekki til neytenda, hún eykur einfaldlega hagnað verslunarinnar,“ sagði Sigmundur Davíð Gunnlaugsson Miðflokki í umræðu um breytta tollkvóta á landbúnaðarafurðum.
„Þá má kannski velta fyrir sér hvort þetta sé ekki bara ríkisstyrkur Íslands til ESB heldur líka styrkur til verslunar — mjög furðuleg hugmynd og virðist ekkert hafa verið hugsuð lengra en eitt skref og jafnvel ekki einu sinni það. Það er mikilvægt að forðast að auka enn á vanda þessarar greinar sem þegar stendur frammi fyrir miklum áskorunum sem stjórnvöld hefðu þurft að bregðast við miklu fyrr.“
„Hvað telja menn að vöruverð myndi lækka lengi ef erlend ríki fengju að hrúga umframframleiðslu sinni inn á íslenska markaðinn og drepa innlendu framleiðsluna? Telja menn líkur á því að verðið héldist áfram eins lágt þegar búið væri að þurrka innlendu samkeppnina í burtu? Er ekki líklegt að verð myndi hækka aftur, fyrir utan það sem ég gat um áðan, að þetta eykur einfaldlega álagningu verslana? Fyrst ég er nú byrjaður á þessum viðvörunarorðum um hugmyndir Viðreisnar o.fl. í þessum málum hefur mörgum þeirra sem fyrir þessu töluðu orðið tíðrætt um frelsi. Þá minni ég á að sterkur landbúnaður er á margan hátt forsenda frelsis fyrir þjóð. Að hafa eigin matvælaframleiðslu er forsenda frelsis því að ella eru menn öðrum háðir um það sem er hvað mikilvægast, að hafa næga fæðu,“ sagði Sigmundur Davíð.
