Segir Samfylkingu í últra frjálshyggju

Oddný Harðardóttir og Lilja Rafney Magnúsdóttir takast á Facebook.

Oddný byrjaði: „Formaður atvinnuveganefndar Lilja Rafney Magnúsdóttir var að mæla fyrir tillögum meiri hlutans um veiðigjöld. Lækkunin á milli ára verður tæpir 4 milljarðar. Lilja kallar það frjálshyggju að vilja tímabundna samninga og endurúthluta eða bjóða út 1/20 af kvótanum á hverju ári til að freista þess að fá hærra verð og gefa möguleika á nýliðun. Og leyfa landshlutunum sem borið hafa kostnaðinn af framsali og hagræðingu í greininni njóta arðsins með því að styrkja sóknaráætlanir landshlutana. En vinstri pólitík að hafa veiðigjaldið sem allra lægst og færa þeim sem fyrir eru á fleti kvótan um ókomna tíð. Er það bara ég sem skil ekkert lengur í Vg?“

Lilja Rafney svarar: „Samfylkingin er orðin markaðshyggjuflokkur sem vill láta fjármagnið ráða með uppboðum hvar veiðiheimildirnar fara! Er samþjöppunin ekki orðin næg í hugum þeirra þar sem 60% fækkun er í útgefnu aflamarki síðustu 12 ár. Bátum í krókaaflamarkaðskerfinu hefur fækkað um 25 % sl. 4 ár. Heldur Samfylkingin virkilega að uppboð á veiðiheimildum gagnist öðrum en þeim fjársterkustu hverju sinni. Samfylkingin stillir sér upp við hliðina á últra frjálshyggju Viðreisnar og skeitir engu um veikar sjávarbyggðir landsins. Samfylkingin var samþykk veiðigjöldum sem voru afgreidd í ríkisstjórn með VG 2012 nú er verið að styrkja enn frekar þá hugmyndafræði með aðkomu Ríkisskattstjóra og Fiskistofu og að afkomutengja veiðigjöld í rauntíma. Ef reiknað hefði verið út veiðigjöld með þessu fyrirkomulagi þá hefðu veiðigjöldin verið hálfum milljarði hærri í dag. Samfylkingi er með tillögum sínum um markaðsleið að hygla stórútgerðinni og draga úr tekjum ríkissjóðs í leiðinn ! Óábyrgur málflutingur í hæsta máta, þú breytir ekki fiskveiðistjórnarkerfinu með lítt útfærðri breytingartillögu við Veiðigjöld í annari umræðu. Hvar er nú ábyrgðin og samráðið!“

Oddný svarar þessu: „Lilja Rafney Magnúsdóttir hér er stefna Vg sem ég tók af heimasíðu ykkar. Þið talið um tímabundna samninga og uppboð. Eruð þið þá líka últra hægri? Tillögur okkar núna eru bara um tímabundna samninga en ekki uppboð og framlög af veiðigjöldum til landshluta. Og það er bara engin sérstök frjálshyggja í því.“

Lilja Rafney á næsta leik: „Oddný Harðardóttir skil ég þig rétt að þið og Viðreisn séuð að leggja til útfærða stefnu VG í sjávarútvegsmálum? Þið hefðuð þá kannski átt að hafa samráð við okkur í VG og vinna í því að leggja fram lagafrumvarp um stjórn fiskveiða en ekki einhverja óskilgreinda uppboðsleið sem breytingatillögu við „veiðigjöld“.

Oddný Harðardóttir á síðasta orðið, allavega í bili: „Lilja Rafney Magnúsdóttir kæra mín. Það fjallar engin breytingartillaga um uppboðsleið. Lestu nú tillögurnar eftir að hafa komið ró á hugann og þá er ég viss um að þú skilur þær.“