Sara Dögg: „Kemur verulega á óvart að Sjálfstæðisflokkurinn í Garðabæ standi ekki með sjálfstæðum skólum“

„Það eru þó nokkur tíðindi að sjálfstæðismenn og vinstri vængur minnihlutans, Garðabæjarlistinn sameinist í afstöðu um rekstrarumhverfi sjálfstætt starfandi skóla,“ segir Sara Dögg Svanhildardóttir oddviti Viðreisnar í Garðabæ, og bætir við:

„Fulltrúar beggja höfnuðu tillögu okkar í Viðreisn um að bæta rekstrarskilyrðin líkt og önnur sveitarfélög eru að gera.“

Hún segir að „það eru ekki mikil tíðindi að sjá vinsti flokka hafna slíkum úrbótum á rekstrarskilyrðum, en að í mekka íhaldsins sé tekin ákvörðun að standa ekki með því að skapa sem best skilyrði fyrir fjölbreytt skólastarf og valfrelsi, verða að teljast heilmikil tíðindi.“

Sara nefnir einnig að „við afgreiðslu tillögunnar lagði ég fram bókun:

„Það kemur verulega á óvart að Sjálfstæðisflokkurinn í Garðabæ standi ekki með sjálfstæðum skólum og greiði atkvæði gegn því að bæta rekstrarumhverfi sjálfstætt starfandi skóla, líkt og ákveðið hefur verið að gera í Hafnarfirði og Reykjavík.”