Það verður ekki látið viðgangast á íslenskum vinnumarkaði .
Fram undan eru fundir um stöðu lífskjarsamningsins. Launagreiðendur vígbúast og vilja ná til baka samningsbundnum launahækkunum. Launafólk berst gegn þeim vilja. Ríkisstjórnin hefur svikið drjúgan hluta þess sem lofað var við gerð samningsins.
„Það er mikið undir í þeim viðræðum sem nú fara í hönd og ábyrgð allra aðila mikil,“ skrifar Drífa Snædal, forseti Alþýðusambandsins.
Hún segir: „Það er því ólíðandi að Samtök atvinnulífsins skuli í sumar hafa gengið gegn reglum á vinnumarkaði með því að styðja Icelandair í fordæmalausum aðgerðum gegn flugfreyjum og þjónum. Það var örlagaríkur föstudagur í júlí þegar stjórnendur Icelandair lýstu því yfir að þeir ætluðu að sniðganga viðsemjendur og semja við aðra um kaup og kjör. Ekki var upplýst um hverjir „þessir aðrir“ voru en það skal sagt eins skýrt og mögulegt er að það er ekki í hendi atvinnurekenda að velja og hafna við hverja þeir semja. Það eru hins vegar þekktar aðferðir úti í heimi að atvinnurekendur reyni að búa til sín eigin stéttarfélög og ganga til samninga við þau. Það verður ekki látið viðgangast á íslenskum vinnumarkaði og þó að flugfreyjur hafi gengið frá samningum þá mun þessi „sumargjöf“ elta okkur inn í haustið og lita þau verkefni sem fram undan eru. Samningsréttur vinnandi fólks verður varinn!“
