ALÞINGI „Voru greiddir eða samþykktir kaupaukar eða réttur til kaupa á hlutabréfum eða öðrum verðmætum í Íslandsbanka hf. við flutning á eignarhaldi hans til ríkisins og ef svo er, hverjir fengu fyrrgreind réttindi og hvað fékk hver og einn háa fjárhæð?“
Þannig hljómar fyrsta spurningin af fjórum sem Oddný G. Harðardóttir, beinir til Bjarna Benediktssonar fjármálaráðherra.
Næsta spurning er svona: „Voru gerðir samningar um hlutdeild einstaklinga eða lögaðila í afkomu bankans á næstu árum í tengslum við flutning á eignarhaldi hans til ríkisins? Ef svo er, um hvernig samninga er að ræða?“
Sem fyrr segir voru spurningarnar fjórar. Sú þriðja er þessi: „Voru í gildi fyrir flutning á eignarhaldinu samningar um valrétti, kaup eða yfirfærslu eignarréttar á hlutabréfum eða hlutdeild í arði eða öðrum ávinningi af rekstri bankans sem tengjast yfirfærslu á eignarhaldi bankans til ríkisins?“
Og sú síðasta er þessi: „Hvaða samningar um kaupauka, rétt til kaupa á hlutabréfum eða yfirfærslu verðmæta til stjórnenda, starfsmanna og annarra aðila voru í gildi við flutning á eignarhaldi bankans til ríkisins?“
