Vilhjálmur Birgisson:
Svo klórar þetta sama fólk sér í hausnum og skilur ekkert af hverju verðbólgan lækkar ekki. Getur það verið að okurvextir fjármálakefisins séu að fóðra verðbólguna?
Á ársfundi Samtaka atvinnulífsins rétt fyrir helgina kom fram í máli Sigríðar Margrétar Oddsdóttur framkvæmdastjóra Samtaka atvinnulífsins að eitt prósent hækkun vaxta kosti íslensk fyrirtæki 30 milljarða á ári.
Í þessu samhengi er rétt að vekja athygli á að frá því við undirrituðum kjarasamninga í byrjun desember á síðasta ári hafa óverðtryggð skuldabréfalán hækkað um 3,5%. Það þýðir að kostnaður fyrirtækja vegna vaxtahækkana hefur hækkað um 105 milljarða og að sjálfsögðu fer hluti af þessum aukna fjármagnskostnaði beint út í verðlagið.
Já takið eftir, stýrivaxtahækkanir Seðlabankans hafa gert það að verkum að fjármagnskostnaður fyrirtækja hefur aukist um 105 milljarða frá undirritun kjarasamninga. En hvað kostuðu kjarasamningar sem undirritaðir voru á hinum almenna vinnumarkaði í desember? Jú þeir kostuðu 76 milljarða sem er 28 milljörðum minna en það högg sem fyrirtæki hafa þurft að taka þá sig vegna okurvaxta fjármálakerfisins.
Svo öskrar Seðlabankinn…
Svo öskrar Seðlabankinn, Samtök atvinnulífsins og stjórnvöld á verkalýðshreyfinguna að hún verði að sýna stillingu við kjarasamningsgerð og það á sama tíma og Seðlabankinn leggur 40% meiri álögur á fyrirtæki en kjarasamningar kostuðu fyrirtækin.
Svo klórar þetta sama fólk sér í hausnum og skilur ekkert af hverju verðbólgan lækkar ekki. Getur það verið að okurvextir fjármálakefisins séu að fóðra verðbólguna? Það er rétt geta þess í þessu samhengi að það kostar 7 milljónum meira að meðaltali að byggja íbúð en fyrir 12 mánuðum og spilar stóraukin fjármagnskostnaður stóran þátt í því.
Hér fer alls ekki saman hljóð og mynd og eina sem þetta ágæta fólk er sammála um er, er að öskra á launafólk og kenna þeim um verðbólguna!
