Helga Vala Helgadóttir skrifaði fyrir stundu:
„Að gefnu tilefni vil ég minna á að þegar mál Sigurrósarmanna var tekið til rannsóknar voru eignir þeirra frystar. Það er eðlilegt vegna þess að það þarf að tryggja fjárhagslega hagsmuni, komi til saksóknar, mögulega dómfellingar og sektar og endurgreiðslum. Frysting eigna er þess eðlis að þá geta eigendur ekki selt eða fært eignir til, í þeim tilgangi að koma þeim undan ef til sakfellingar kemur en hagnýting þeirra er enn fyrir hendi.
Þegar Samherjaskjölin voru opinberuð í lok árs 2019 nefndi ég að eðlilegt væri að einhverjar eignir samherja yrðu frystar, til að tryggja þá hagsmuni sem eru undir ef til sakfellingar kemur. Þá var látið eins og ég væri með þessu að vega að börnum starfsmanna fyrirtækisins, þegar allir vita að frysting þýðir ekki að sigla skipum í höfn eða loka frystihúsum heldur tryggja að ekki sé hægt að skjóta eignum undan valdi réttvísinnar.
Skömmu síðar urðu eigendaskipti á öllum eignarhlutum í fyrirtækinu, þegar börn fyrri eigenda eignuðust hlutinn í arf. Málið er hins vegar enn til rannsóknar bæði hér á landi og öðrum ríkjum.“