Má Guðmundssyni, og áhöfn hans í Seðlabankanum, bíður að mæta Þorsteini Má Baldvinssyni, og áhöf hans í Samherja, í átökum. Átökum þar sem hart verður barist. Þorsteinn Már, sem hefur vinninginn, allavega sem stendur, er reiður. Hann er tilbúinn í átök.
Vald það sem Már og Seðlabankinn hafa gegn öðru fólkið er vandmeðfarið. Verði nýr dómur síðasta orð dómstóla er ljóst að illa hefur verið farið með það vald. Samherjafólkið hefur í fimm ár þurft að glíma við Seðlabankann með allskyns óþægindum og kostnaði. „Þetta er ótrúlega ljótt mál. Það er sárt að sjá hvernig stjórnsýslan í þessu máli hefur verið frá upphafi. Menn hafa fengið mörg tækifæri til að láta staðar numið, en ekki gert það. Allt framferði Seðlabankans í þessu máli hefur miðað að því að valda okkur sem mestum skaða. Þannig var búið að senda tilkynninguna um húsleit hjá okkur út um allan heim klukkustund eftir að hún var framkvæmd,“ segir Þosteinn Már í Morgunblaðinu í dag.
Allt það fólk sem hefur lagaheimildir til að grípa svo sterkt inn í líf annarra verður að fara varlega. Auðvitað þarf að vera hægt að rannsaka mál þar sem grunur er um lögbrot. Það breytir ekki alvarleika þess að grípa að freklega inn í eða búa til nýja atburðarrás.
„Það er ákveðin klíka innan bankans sem hefur rekið þetta mál af ótrúlegum fantaskap,“ segir Þorsteinn í Morgunblaðinu.
Málinu er sýnilega ekki lokið. Óvíst er hvort Seðlabankinn áfrýjar dómi Héraðsdóms Reykjavíkur til Hæstaréttar. Þorsteinn Már í Samherja er ekki hættur. „Við látum ekki kyrrt liggja.“
-sme
