Samfylkingin þarf ekki að vera til

Árni Páll Árnason, fyrrverandi formaður Samfylkingarinnar var gestur Morgunavaktarinnar á Rás 1 í morgun. Hann var tregur til að ræða stöðu Samfylkingarinnar.

Árni Páll var gestur í Sprengisandi á Bylgjunni í febrúar 2016. Þá var hann spurður hvort hann sjái fram á sameiningu stjórnmálaflokka, til dæmis Samfylkingarinnar og Bjartrar framtíðar og hver þróunin geti orðið meðal stjórnarsandstöðuflokkanna.

Hér er frétt frá þeim tíma og viðtalið er hér.

„Ég vil vera í fjöldahreyfingu,“ svaraði Árni Páll, þegar hann var inntur eftir þessum orðum í eigin bréfi. „Er Samfylkingin tilbúin að rúma ólíkar skoðanir en sameinast um meginlínur félagslegs réttlætis og jafnra tækifæra, eða er gerð krafa um eina skoðun og eina leið í öllum málum? Fyrri leiðin er leið fjöldahreyfingar jafnaðarmanna. Seinni leiðin er leið hefðbundins vinstri flokks. Við verðum að velja þar á milli.“

Hef verið í kreddufullum vinstri flokki

„Ég hef prófað að vera í kreddufullum vinstri flokki. Ég hef prófað það og langar það ekki aftur. Í okkar ranni hefur gætt öfundar í garð VG fyrir að vera bara alltaf með eina skoðun í hverju máli. Það er bara ekki öfundsvert. Við eigum, umfram allt, að passa okkur á að hafa fjölbreytt svigrúm til skoðana, en sameinast um eina meginlínu. Þannig þurfa breiðfylkingar jafnaðarmanna að vinna og við getum ekki verið forksriftaflokkur.“

Katrín Jakobsdóttir, formaður VG, talar um kosningabandalag fyrir komandi kosningar og það gera Píratar líka, en ekki á sömu forsendum. „Ég held að við séum fullkomlega með í að, og höfum lagt mikið til þess á yfirstandandi kjörtímabili, að tryggja samstöðu stórnarandstöðuflokkanna á Alþingi og vil halda því áfram. Ég er tilbúinn að ræða allt, sameiginleg áherslumál, kosningaupplegg, hvernig sem svo það er. Ég held að það sé almennur vilji til þess í Samfylkingunni. Það er mikilvægt að tryggja grundvallarbreytingar á sviði lýðræðisumbóta. Við verðum að fá réttinn til þjóðaratkvæðisgreiðslna, við verðum að fá þjóðareign á auðlindum. Takist það ekki á þessu kjörtímabili verður það að vera í algjörum forgangi. Öðruvísi er ekki hægt að stjórna landinu. Það verða einnig að verða úrbætur fyrir lífeyrisþega, í húsnæðismálum. Það er margr sem þarf að gera. Stjórnarandstöðuflokkarnir verða að setjast yfir þetta sameiginlega og tala um hvernig við myndum vilja stilla saman strengi. Það væri gott að fá VG, Pírata og Bjarta framtíð að borðinu með okkur.“

„…ég þarf ekki að vera formaður…“

Sérðu fyrir þér sameiningu flokka, til dæmis ykkar Bjartrar framtíðar?

„Það er jafnaðarmannaflokkur á Íslandi og það þarf að vera flokkur jafnaðarmanna sem aðhyllist alþjóðahugmyndafræði jafnaðarmanna, hann verður alltaf til. Hann þarf ekki að heita Samfylkingin og þarf ekki að vera eins í laginu og Samfylkingin er núna og ég þarf ekki að vera formaður í honum, en hann þarf að vera til.“

-sme