Greinilega var drepleiðinegt þennan dag.
Sigurjón M. Egilsson skrifar:
Steingrímur þingforseti er ekki saklaus af mikilli vantrú fólks á störfum Alþingis. Ekki aldeilis. Klausturflokkurinn ber eflaust mesta ábyrgð á stöðunni. En það gera fleiri. Ekki síst Steingrímur. Sem nú harmar stöðuna. Steingrímur lék afleik þegar hann tjáði sig um Klaustursfólkið og gerði sig vanhæfan til að sinna skyldum sínum sem þingforseti. Ekki má útiloka að hann hafi gert það viljandi til að komast hjá því að taka á málinu. Hugsanlega var það svo.
Stóra flipp Steingríms er einkasýning hans á Þingvöllum í sumar. Eitt mesta asnaspark þingsins í langan, langan tíma. Ekki bara vegna kostnaðarins. Sem fór hundrað prósent fram úr áætlun. Samt var vel í lagt. Framúrkeyrsla Steingríms, þennan hallærislega dagpart á Þingvöllum, er jafn há og kostar að reka lýðháskólann á Flateyri í heilt ár.
Þingfundurinn var ekki um neitt. Nema kannski myndatökur af Steingrími. Hann vildi eigna sér hluta af Íslandssögu samtímans. Allt kostaði þetta mikla peninga og dró mikið úr virðingu þingsins. Annað var ómögulegt.
Fleira er hægt að taka til um störf Steingríms. Þess þarf ekki. Nýliðin fortíð dugar. Nafni hans, Sigmundur Davíð, ber sennilega meiri sök á hvernig komið er fyrir Alþingi Íslendinga. En Steingrímur J. hefur lýst vonbrigðum með hvernig komið er. Án þess að nefna eigin afleiki á nafn.
