Þorgerður Katrín Gunnarsdóttir, formaður Viðreisnar, gaf ríkisstjórn Katrínar Jakobsdóttir ekki háa einkunn, í þingræðu í dag, hvað varðar kvótann og rétt kvótaþega.
„Meðan stjórnarmeirihlutinn hefur í þrígang hafnað og fellt, stráfellt, tillögur okkar í stjórnarandstöðunni, Viðreisn og fleiri flokka, um að tímabinda samninga, þá óttast ég það auðlindaákvæði sem verið er að vinna með af hálfu stjórnarflokkanna,“ sagði Þorgerður Katrín Gunnarsdóttir á Alþingi í dag.
„Af hverju vil ég fá auðlindaákvæði í stjórnarskrá? Jú, ég tel að það festi í sessi þá hugsun sem ég tel að meiri hluti þingmanna í þessum sal sé sammála um, að það er mikilvægt að hluti af grunngildum samfélags okkar birtist með þessum hætti í stjórnarskrá,“ sagði Katrín forsætisráðherra og lét sem Sjálfstæðisflokkurinn sé ekki til. Hann hefur ráðið allri vinnu um breytingar á stjórnarskrá. Sá sem skemmst vill fara ræður hvert farið verður. Það er Sjálfstæðisflokkurinn.
