Ríkisstjórnin og fátækt fólk / dánarbætur, sjúkrabætur og barnabætur eru skertar

…halda áfram að skerða atvinnutekjur, dánarbætur, mæðra- og feðralaun, sjúkrabætur, lífeyrissjóð, leigubætur, barnabætur…

„Tölum um skerðingar og keðjuverkandi skerðingar sem valda þeim, sem reyna af fremsta megni að tóra á ömurlegu kerfi almannatrygginga á Íslandi, skelfingu, vannæringu, þunglyndi, kvíða, pirringi og óróa,“ sagði Guðmundur Ingi Kristinsson í þingræðu.

„Hvað með börnin í þessum ömurlegu aðstæðum og afleiðingar á þau í nútíð og framtíð? Þetta er það sem ríkisstjórnin býður þeim upp á sem verst hafa það á Íslandi, að halda áfram að skerða atvinnutekjur, dánarbætur, mæðra- og feðralaun, sjúkrabætur, lífeyrissjóð, leigubætur, barnabætur, þannig að þeir verst settu séu ekki í fátækt heldur skildir eftir í sárafátækt. Það er ömurlegt. Og á sama tíma hafa þeir sem hafa óheftan aðgang að auðlindum þjóðarinnar aldrei grætt meira og vita ekki aura sinna tal.“

„Það er ekki á dagskrá ríkisstjórnarinnar að fara að lögum. Í 69. gr. almannatrygginga segir skýrt að miða skuli við launaþróun, en vísitölu ef hún er betri og hagstæðari. Flokkur fólksins segir: Leiðréttum strax kjaragliðnun í almannatryggingakerfinu og útrýmum fátækt. Það á enginn á Íslandi að lifa á minna en 350.000 kr. skatta- og skerðingarlaust. Stöðvum þannig fjárhagslegt einelti ríkisstjórnar í garð þeirra sem svelta í hennar boði í dag,“ sagði Guðmundur Ingi.