Núverandi ríkisstjórn er hörð hægri stjórn. Svipsterk og einbeitt. Það sem hægri menn hafa kallað eftirlitsiðnað ætlar ríkisstjórnin að fella. Með öllum ráðum. Lófaklappið fær ríkisstjórnin úr Borgartúni 35, húsi atvinnurekenda. Ekki úr húsi öryrkja sem enn bíða réttlætis.
Það nýjasta er að gera atvinnurekendur dómara í eigin sök með því að vængbrjóta Samkeppniseftirlitið. Slíkt gerir bara hinn harði stálhnefi. Miskunnarlaust.
Ríkisstjórnin hefur þegar stigið markvert ógæfuspor fyrir allan almenning en gæfuspor fyrir auðvaldið. Fjármálaeftirlitið hefur þegar verið vængstýft. Fært aftur undir Seðlabankann.
Það eru engin ljós við enda ganganna.
„Fjármálaeftirlit og starfsemi seðlabanka á að vera aðskilið. Það er alltaf betra að opinber stofnun hafi sem fæst markmið. Ef hún hefur mörg markmið, sem eru illa skilgreind og stangast hvert á við annað, þá er hætta á því að annað verði undir og hitt ofan á,“ sagði Jón Daníelsson , hagfræðingur við London School og Econmics, sagði í viðtali fyrir fáum árum.
„Vandamálið er að þegar seðlabanka er fengið of víðtækt hlutverk þá eru meiri líkur á því að eitthvað fari úrskeiðis sem þá um leið dregur úr trúverðugleika hans. Það aftur hefur áhrif á getu seðlabanka til að framfylgja þeim málaflokkum sem eru taldir skipta mestu máli við stjórnun peninga- og efnahagsmála.“
Jóni Danielssyni treysti ég betur en forystufólki hinnar grimmu hægri stjórnar Katrínar Jakobsdóttir. Er nema von að lófaklappið berist frá Borgartúni 35.
Við, fólkið í landinu, verðum að standa hina hörðu ríkisstjórn af okkur, en sjáum samt ekki að betra muni taka við. Það eru engin ljós við enda ganganna.
-sme
