Gunnar Smári skrifar:
Könnun Prósent fyrir Fréttablaðið sýnir að ríkisstjórnin er kolfallin, fengi aðeins tæp 44% atkvæða og 29 þingmenn. Sjálfstæðisflokkurinn tapar tveimur þingmönnum og VG tveimur, umfram þá tvo sem týndust á kjörtímabilinu. Framsókn heldur sínu.
Sósíalistar fengju fimm þingmenn og eru sterkari en bæði Miðflokkurinn og Flokkur fólksins sem berjast við að komast yfir 5% þröskuldinn. Að þessu sinni er Miðflokkurinn yfir línu en Flokkur fólksins er undir, eins og í flestum könnunum að undanförnu.
Viðreisn bætir við sig fjórum þingmönnum og Samfylking og Píratar sitthvorum. Frjálslyndi lýðræðisflokkurinn og Ábyrg framtíð mælast varla.
Ef við skiptum þingheim í blokkir þá er hægrið, Sjálfstæðisflokkur, Miðflokkur og Viðreisn, með tæp 39%, vinstrið, Sósíalistaflokkur, VG og Samfylkingin, með tæp 32%, og miðjan, Framsókn, Píratar og Flokkur fólksins með tæp 29%.
Ef horft er til breytinga á kjörtímabilinu þá er þetta sveiflan frá kosningum:
Flokkar sem bæta við sig:
- Sósíalistaflokkurinn: +7,7 prósentustig
- Viðreisn: +4,9 prósentustig
- Píratar: +2,3 prósentustig
- Samfylkingin: +2,1 prósentustig
- Framsókn: +1,9 prósentustig
Flokkar sem missa fylgi:
- Flokkur fólksins: –2,2 prósentustig
- Sjálfstæðisflokkur: –3,9 prósentustig
- Miðflokkurinn: –5,0 prósentustig
- Vg: –6,9 prósentustig