Hirða stundum alla desemberupppbót öryrkja

„Stór hópur þessa fólks fær ekki desemberuppbót. Það gleymist alltaf, þeir gleyma því og vilja ekki segja frá því. Hún skerðist alveg niður í núll.“

Guðmunur Ingi Kristinsson, Flokki fólksins, minnti nafna sinn, Guðmund Inga Guðbrandsson félagsmálaráðherra á að Bjarni Benediktsson hafi bent á félagsmálaráðherra í umræðu um fjáraukalög að það væri í verkahring hans að gera tillögu um jólabónus upp á 50.000 kr. eingreiðslu, skatta- og skerðingarlaust.

Guðmundur Ingi, Flokki fólksins „Er á dagskrá hjá honum að leggja fram tillögu um þetta svo öryrkjar og einstæðingar og eldra fólk sem hokra nú og reyna að eiga fyrir mat eigi smámöguleika á að halda heilög jól?“

Hann hélt áfram: „Í andsvari við mig sagði hæstvirtur félagsmálaráðherra að í fyrra hefði vissulega verið eingreiðsla sem kom til vegna Covid-19 faraldursins, en þau hefðu ekki horft til þess að það kæmi til eingreiðslu að þessu sinni. Covid-19 faraldrinum er langt frá því lokið og er á hraðri uppleið. Veikt fólk, sérstaklega það sem er með undirliggjandi sjúkdóma, er einangrað heima hjá sér og á enga möguleika á að fara í röð eftir mat, hvað þá að fá sendan mat heim, því að eins og þessir einstaklingar hafa bent mér á duga lífeyrislaunin hjá flestum bara í viku eða tíu daga. Vanlíðan, hræðsla og allt að því skelfing einkennir þá sem verst hafa það og hvað þá þau sem eru með börn á framfærslu sinni við þessar ömurlegu aðstæður. Ákallið um hjálp höfum við sannarlega fengið í tölvupóstum til okkar. Einnig hef ég fengið símtöl frá fólki sem er við það að gefast upp á að lifa við þessar ömurlegu aðstæður. Hvað ætlar hæstvirtur ráðherra að gera í þessum málum því þau þola enga bið lengur?“

Þá svaraði Guðmundur Ingi ráðherra:

„Hugmyndin er að breyta kerfinu, einfalda það, gera það skiljanlegra og gera það sanngjarnara með þeim hætti að þau sem ekki geta séð sér farborða hafi hærri ráðstöfunartekjur. Og á sama tíma að auðvelda þeim sem geta unnið fyrir sér að hluta til að komast út á vinnumarkaðinn án þess að skerða þurfi heildartekjur of mikið. Þetta er risavaxið verkefni. Ég er farinn að funda með aðilum, hagsmunaaðilum og hagaðilum um þessi mál og vonast til að setja vinnu í gang sem fyrst upp úr áramótum þegar kemur að þessum þætti málsins.“

Og hér: „Þetta snýst um mögulegar eingreiðslur sem tengjast Covid-faraldrinum. Ég held að það sé alveg sanngjarnt að horfa líka til þess að þar sem ekki er búið að bæta kerfið megi horfa til þess að svona eingreiðsla geti komið til og við viljum öll að hér geti öll í okkar samfélagi átt gleðileg jól, gefið gjafir, borðað góða jólamáltíð og þar fram eftir götunum. Því segi ég, líkt og fjármála- og efnahagsráðherra sagði í umræðunni í gær og ég líka, að við munum að sjálfsögðu skoða þetta í meðförum þingsins.“

Þingmaðurinn var ekki sáttur. „…vil ítreka eitt sem við höfum ekki áttað okkur á í þessu samhengi, varðandi þessa 50.000 kr. eingreiðslu, skatta- og skerðingarlausar: Hverjum myndi hún duga best? Jú, fólki úti á landi, fólki sem ekki kemst í röð eftir mat, fólki sem er fast heima hjá sér og kemst ekki út til að ná sér í mat, fólki sem á ekki krónu og við skiljum eftir heima núna rétt fyrir jólin úti á landi eða einangrað í Reykjavík, og segjum við það: Covid er búið. Þið fenguð Covid-greiðslu í fyrra. En það dugar ekki til. Þið fáið desemberuppbót. En stór hópur þessa fólks fær ekki desemberuppbót. Það gleymist alltaf, þeir gleyma því og vilja ekki segja frá því. Hún skerðist alveg niður í núll. Það eina sem skilar sér til þessa fólks er 50.000 kr., skatta- og skerðingarlausar. Það er ekki of mikið. Þegar við setjum 800–900 milljónir í fjölmiðla eða 800–900, 1 milljarð í að breyta ráðuneytum þá hlýtur að vera til sama upphæð fyrir þetta fólk.“

Guðmundur Ingi ráðherra: „Ég er staðráðinn í því að reyna að gera mitt allra besta til að við getum bætt kjör þeirra sem búa við fátækt á Íslandi. Fátækt er meinsemd sem við eigum ekki að líða í samfélagi okkar og ég veit að við erum öll sammála um að það er verkefnið fram undan að bæta úr því.“