Reykjavík er rót vandans
Þingmaðurinn Njáll Trausti Friðbertsson gagnrýnin á Reykjavík sem hann segir bera mesta ábyrgð á vanda á húsnæðismarkaði.
„Víða á landsbyggðinni, á ákveðnum vaxtarsvæðum, segjum Húsavík, Vesturbyggð, í laxeldinu þar, er ekki hægt að byggja.“
„Ég hef oft bent á og rætt á öðrum vettvangi um hvernig þessi mál hafa verið á höfuðborgarsvæðinu, skoðað tölur,“ sagði þingmaður Sjálfstæðisflokksins, Njáll Trausti Friðbertsson, í umræðu um húsnæðismál.
Hann sagði að á árunum 1994–2014 hafi íbúðum í Reykjavík fjölgað um 18 prósent en í kraganum, þ.e. er í kringum Reykjavík, á Seltjarnarnesi, í Mosfellsbæ, Kópavogi, Garðabæ og Hafnarfirði, um 76 prósent. „Ég held að í þessu liggi að mörgu leyti rót vandans. Þetta segir rosalega mikið um framboð á lóðum og hvernig menn hafa farið í hlutina. Menn hafa farið hratt fram við þéttingu byggðar en skilið möguleika á nýjum svæðum út undan, það hefur verið stór hluti af þessari þróun.“
Njáll Trausti kom víðar við: „Víða á landsbyggðinni, á ákveðnum vaxtarsvæðum, segjum Húsavík, Vesturbyggð, í laxeldinu þar, er ekki hægt að byggja. Það er dýrt að byggja, alltof mikill munur á milli markaðsverðmætis og byggingarkostnaðar. Ég velti því fyrir mér hvernig menn ætla að ná utan um það.“
