Ekki er annað að sjá en Boga Nils Bogasyni og Halldóri Benjamín Þorbergssyni hafi tekist vel upp. Þeir hafa hoggið stórt skarð í samstöðu launafólks. Fyrst með ósvífni aðgerð gegn flugfreyjum og svo undir helgina tókst þeim að ná meirihluta miðstjórnar Alþýðusambandsins á sitt band. Einstakur árangur.
Sólveig Anna Jónsdóttir, sem er bæði formaður Eflingar og annar varaforseti Alþýðusambandsins, sat ein eftir í andstöðu við framgang þeirra Boga Nils og Halldórs Benjamíns. Sólveig Anna er staðföst. Hún er líka helst von þess fólks sem verst stendur. Baráttukona.
Nú þarf hún einnig að glíma við „samherja“ sína innan launþegahreyfingarinnar. Minnir ögn á hvernig „samherjar“ Vilmundar heitins Gylfasonar, brugðust við framgangi hans og þeirri athygli sem hann fékk. Sumum verður óbærilega kalt í skugganum.
Drífa Snædal, forseti Alþýðusambandsins, skýrir mál sitt á vef ASÍ:
Boga Nils og Halldóri Benjamín tókst hið ótrúlega.
„Það hefur ekki farið fram hjá mörgum að það gustaði hressilega í þessari viku þegar sjónarmið tókust á um hvort undirrita ætti sameiginlega yfirlýsingu með Icelandair og Samtökum atvinnulífsins þar sem kom fram viðurkenning á að framganga þeirra gagnvart flugfreyjum í sumar hafi ekki verið samkvæmt reglum vinnumarkaðarins. Ég tel slíka viðurkenningu mikilvæga, ekki eingöngu fyrir Flugfreyjufélag Íslands, heldur fyrir allt launafólk á Íslandi í dag og til framtíðar. Ég gekk til samkomulagsins í umboði miðstjórnar ASÍ en að undangenginni ítarlegri umræðu. Í henni var mikill meirihluti hlynntur því að fá þessa viðurkenningu fram í gegnum samkomulag fremur en að láta reyna á mál fyrir dómstólum, enda stýrum við atburðarás í samningum frekar en fyrir dómi.“
Því miður fyrir launafólk þá er þetta ekki búið. Boga Nils og Halldóri Benjamín tókst hið ótrúlega. Hoggið er stórt skarð í raðir launafólks. Á hreint ómögulegum tíma.
-sme
