Rafrettur verði ekki seldar í skólum

„Alþjóðaheilbrigðismálastofnunin hefur lagt áherslu á að ríki setji sömu reglur um rafrettunotkun og gilda um tóbaksreykingar þar til sýnt hefur verið fram á skaðleysi varanna og hefur verið litið til þessarar afstöðu stofnunarinnar við gerð frumvarpsins,“ segir í greinargerð með nýju lagafrumvarpi heilbrigðisráðherra um rafrettur og sölu á þeim.

Þar segir einnig að í frumvarpinu sé lagt til að óheimilt verði að selja rafrettur eða áfyllingar í skólum og á öðrum stöðum sem ætlaðir eru til félags-, íþrótta- og tómstundastarfs barna og ungmenna og á heilbrigðisstofnunum og öðrum stöðum þar sem heilbrigðisþjónusta er veitt. „Einnig verði óheimilt að auglýsa rafrettur og áfyllingar eða koma þessum vörum á framfæri með notkun í markaðssetningarskyni sem og að hafa rafrettur og áfyllingar sýnilegar á sölustöðum, að undanskildum sérvöruverslunum þar sem heimilt er að hafa vörurnar sýnilegar þegar inn í verslun er komið.“

Með frumvarpinu er lagt til að sett verði aldurstakmark fyrir kaupum og sölu á rafrettum og áfyllingum fyrir rafrettur þannig að einungis einstaklingum eldri en 18 ára verði heimilt að kaupa rafrettur og áfyllingar fyrir þær og sama gildi um þá sem selja rafrettur eða áfyllingar. Þá er gerð krafa um að viðhlítandi merkingar verði á umbúðum rafrettna og áfyllinga. Lagt er til að óheimilt verði að hafa á umbúðum rafrettna eða áfyllinga texta eða myndmál sem geti höfðað sérstaklega til barna og ungmenna, m.a. með myndskreytingum eða slagorðum, og þannig hvatt til neyslu rafrettna.