Sigurjón Þórðarson:
Það fer ekki á milli mála, að aflareglan þ.e. sú gamla og einnig sú endurskoðaða hefur aldrei gengið upp og mun aldrei ganga upp.
Það fer ekki á milli mála að Svandís Svavars setur allt sitt traust á þá sem hún kallar vísindamenn. Hverjir eru það og hvað hafa þeir gert?
Það kemur eflaust mörgum á óvart að þeir sem komu að gerð aflareglunnar sem ráðherra telur vera heilaga að stöðva beri fyrirvaralaust handfæraveiðar, voru fyrst og fremst hagfræðingarnir Dr. Gunnar Haraldsson, Dr Sveinn Agnarsson og jú Dr. Ragnar Árnason. Aflareglan byggir ekki á neinni vistfræði og það ætti því ekki að koma neinum á óvart að umrædd aflaregla hefur aldrei skilað tilætluðum árangri!
Hér að neðan er graf höfunda núgildandi aflareglu þeirra Dr. Sveins og Dr, Gunnars sem gert var árið sem fyrri aflaregla var endurskoðuð, árið 2007. Endurskoðað reglan átti að vera skotheld og leysa af hendi eldri reglu sem átti að skila jafnstöðuafla upp á 400 þús tonn í þorski.
Ef farið er yfir grafið þá sést að búið var að gíra niður væntingarnar og endurskoðaða aflareglan átti að skila stöðugum þorskafla yfir 300 þús tonn í þroski, frá árinu 2012 – það hefur heldur betur ekki gengið eftir.
Það fer ekki á milli mála, að aflareglan þ.e. sú gamla og einnig sú endurskoðaða hefur aldrei gengið upp og mun aldrei ganga upp, þar sem hún gengur gegn líffræðilegum lögmálum um þéttleikaháð afföll, í villtum dýrastofnum. Þegar núerandi forstjóri Hafró var spurður út í þessar staðreyndir, þá flutti hann þokukennda óskiljanlega ræðu sem ég mun greina frá í frekari skrifum.
Það sem ég skil ekki er hvers vegna ráðherra telji ráðgjöf sem aldrei hefur gengið upp heilaga?
Það sem ég skil enn síður er hvers vegna ráðherra fær þá sem augljóslega hafa haft rangt fyrir sér hvað varðar veiðiráðgjöf þ.e. þá Dr. Gunnar Haraldsson og Dr. Svein Agnarsson í að vera einhverja áttavita og leiða endurskoðun á þeirri vinnu sem fram fer í Auðlindinni okkar?