Ráðherrar í rándýrum reddingum

„Stjórnvöld vilja kaupa Hótel Sögu fyrir Háskóla Íslands. Kaup og endurbætur eru áætluð að kosti 6,5 milljarða kr. og það er heimild til þessa í fjárlögum, 6,5 milljarðar. Við vitum öll að það mun taka mörg ár að breyta þessu fornfræga hús í skólahús og reynslan sýnir okkur líka að raunkostnaður er yfirleitt mun hærri en áætlanir. Það má jafnvel tala um óútfylltan tékka í þessu samhengi við svona gjörninga,“ sagði Hanna Katrín Friðriksson á Alþingi.

„Þess vegna hlýt ég að spyrja: Er þetta hagstæður gjörningur fyrir hið opinbera? Er hér farið vel með skattfé almennings? Er það betri meðferð opinbers fjár að kaupa, gera upp og gjörbreyta sögufrægu húsnæði sem er að sögn mikið skemmt, frekar en að reisa byggingu sem er sérstaklega hönnuð með þarfir háskólans í huga?“

Hanna Katrín hélt áfram: „Þessar vangaveltur um forgangsröðun verkefna eru ekki gripnar úr lausu lofti. Tökum dæmi: Ríkisstjórnin stefnir í að reka ríkissjóð með 170 milljarða kr. halla á næsta ári. Hún telur sig ekki hafa svigrúm til að niðurgreiða sálfræðiþjónustu líkt og Alþingi hefur farið fram á og hún ætlar að lækka framlög til mennta- og menningarmála um 2,3 milljarða kr. á milli ára. Svo má líka horfa á þetta með þeim augum að víða um land er húsnæðisskortur og önnur hótel en Hótel Saga eru í rekstrarvanda. Ætli ríkisstjórnin stefni að því með sömu rökum að kaupa þau hótel og gera að íbúðum? Eða eru rekstraraðilar Hótel Sögu í sérstöðu þegar kemur að rándýrum reddingum eins og þessum sem almenningur greiðir fyrir á endanum?“