Nánast var hægt að vorkenna Sigurði Inga Jóhannssyni í Kastljósinu í gær. Angans maðurinn stóð á gati, trekk í trekk. Rætt var um skemmdir í íbúðarhúsum og baráttu kaupenda til að ná rétti sínum.
Formaður Framsóknar var orðinn þurr í munninum við að lýsa hversu vel hann þekkti það sem var að tala um. Sagði ítrekað ýmsar lausnir vera til. Gefum honum að hann hafi vitað hvað hann var að segja.
Þá er spurt hvers vegna í ósköpunum stendur þá á því að ráðherra sem veit, hefur ekkert gert. Meðan hann er með alla þá vitneskju sem hann lýsti í Kastljósinu er ekkert gert og fólk tapar jafnvel drjúgum hluta eigna sinna. Vegna þess að ráðherrann starir á lausnirnar alla daga en hefur sig ekki til að gera neitt.
Ein versta frammistaða ráðherra í langan tíma. Fær ekki einu sinni hálfa stjörnu. Í Pressunni sálugu var hægt að fá hauskúpu fyrir afleita frammistöðu.
