Uppsafnaður vandi er öllum ljós, fjárfestingarþörfin í heild er 350 milljarðar.
Helga Vala Helgadóttir Samfylkingu, velti af stað tímabærri umræðu um samgöngur og samgönguáætlunina, á Alþingi í gær:
„Uppsafnaður vandi er öllum ljós, fjárfestingarþörfin í heild 350 milljarðar og það liggur fyrir að þetta er staða vegna pólitískrar ákvörðunar stjórnvalda sem hafa tekið þá ákvörðun að vanrækja algjörlega þennan þátt innviða sem er samgöngukerfið.“
Og hún hélt áfram á svipuðum nótum:
„Hér er talað um að samgönguáætlun sé fullfjármögnuð en mig langar eiginlega að velta upp þeirri mynd að hún sé í rauninni vanfjármögnuð vegna þess að það er ekki farið í þær nauðsynlegu aðgerðir sem þarf að fara í.“
„Er sú staða sem uppi er með þetta svelta innviðakerfi sem samgöngukerfið okkar er, ekki áfellisdómur yfir stjórnvöldum og fyrri ríkisstjórnum vegna þess hvernig þær hafa hagað málum?“
Jón Gunnarsson svaraði Helgu Völu:
„Er búið að vanrækja alveg þennan þátt? Ja, það var nú samgönguráðherra úr flokki háttvirts þingmanns sem fyrstur lagði fram þessar hugmyndir 2007–2008.“
