Sólveig Anna skrifar:
Ég bið öll agalegs forláts en ég fæ ekki orða bundist á þessum fallega morgni þegar sjálft undursamlegt og blessað vorið er í loftinu og finn mig bókstaflega knúna áfram af einhverri nauðhvöt sem ég einfaldlega verð að láta undan:
Það var algjört smámál að lækka launin mín um 300.000 krónur. Þið mynduð ekki trúa því hvað það var auðvelt. Ég hugsaði um það í smá tíma og framkvæmdi svo. Bókstaflega svona einfalt.
Ég bara varð að koma þessu á framfæri af því að ég vil ekki að Friðrik Sophusson, stjórnarformaður Íslandsbanka og meðlimur pólitískrar og efnahagslegrar yfirstéttar til margra áratuga, komist upp með að halda því fram að launalækkun Birnu Einarsdóttur hafi verið voðalega vandasöm. Það er aldeilis ekkert erfitt að lækka laun, ég hef prófaði það og veit því af persónulegri reynslu um hvað ég er að tala. Piece of cake og á endanum eiginlega það auðveldasta sem ég hef gert.
