„Ég vil nota tækifærið til að taka fullkomlega undir með sjálfum mér og standa við þær fullyrðingar sem komu fram í ræðu minni 22. desember. Stefna Bjartrar framtíðar er jákvæð gagnvart fjölbreyttu rekstrarformi en er það ekki gagnvart gróðavæðingu eða stórkostlegri einkavæðingu í heilbrigðiskerfinu.“
Þannig svaraði Óttarr Proppé, meðal annars, spurningum Einars Brynjólfssonar, á Alþingi í dag. Einar vildi vita hvort Óttarr sé enn sömu skoðunar og hann var í desember hvað varðar leyfi til Klíníkunnar til reksturs sjúkrahúss.
Einar: „Nú spyr ég ráðherrann beint út: Ef honum berst umsókn um starfsleyfi frá þessu tiltekna fyrirtæki sem ég nefndi áðan, mun hann segja já eða nei við slíkri umsókn?“
Óttarr: „Ég tek undir aftur þessi flugmælsku orð mín frá því í desember og get fullvissað háttvirtan þingmann um að ég kann að hafa sagt eitthvað af viti aðra mánuði. Ég get fullvissað þingmanninn um að það er ekki ég sem veiti starfsleyfi fyrir starfsemi eða stofum, aðstöðu sérfræðinga úti í bæ, það er embætti landlæknisins sem veitir starfsleyfi fyrir stöðinni. Það er hins vegar á valdi heilbrigðisráðherra að fela sjúkratryggingum að gera sérstaka samninga við slíka stöð um verk eða þjónustu sem er umfram rammasamning við Læknafélag Reykjavíkur. Slíkt stendur ekki til hjá mér.“
