Össur hrífst af Sósíalistaflokki

Fyrrverandi formaður Samfylkingarinnar, Össur Skarphéðinsson, telur brýnt að Sósíalistaflokkurinn fái mann kjörinn í komandi borgarstjórnarkosningum. Hann skrifar á Facebook og segir:

„Ef ég væri Pírati og vildi bylta kerfinu myndi ég líklega kjósa Sósíalistaflokkinn í vor. Sérstaklega af því það virðist ekki vanta nema prósentubrot til að sossarnir nái manni í borgarstjórn. Píratar eru orðnir meðvirkur kerfisflokkur meðan Sossarnir eru ekta byltingarsinnar, lúnir af lamstri stéttabaráttunnar og vilja steypa auðvaldinu. Tötraöreigarnir, svo vitnað sé í gamlan spámann, þurfa málsvara á tímum sem eru án eldmóðs,“ skrifar Össur.

Hann hnýtir svo í Gunnar Smára Egilsson: „Svo á Sósíalistaflokkurinn líka umbun skilda fyrir þá pólitísku smekkvísi að hlífa þjóðinni við því að hafa handhafa sannleikans, Gunnar Smára, í framboði. Hann er þó að læra mannasiði. Sjálfur er ég sósíaldemókrati dauðans, og kýs minn Dag í vor. – Öll vor ef því er að skipta. Lifi stéttabaráttan!“