Þjóðfélag sem kemur svona fram við veikt fólk, er vont þjóðfélag.
Katrín Baldursdóttir skrifar:
Öryrkjum er boðið upp á samfellda niðurlægingu af stjórnvöldum. Öryrkjar eru dæmdir til fátæktar fyrir það eitt að hafa orðið veikir. Og Tryggingastofnun kemur fram við þá af vanvirðu. Láta þá ekki einu sinni vita af réttindum sínum. Öryrkjar þurfa að heyra út í bæ ef eitthvað breytist er varðar réttindi. Eða þeir heyra það óvart í samskiptum við TR. Svona eins og þeir eigi ekkert gott skilið. Séu hálfpartinn að stela af stjórnvöldum. Eigi að skammast sín fyrir að hafa orðið veikir og því eigi þeir aðeins að fá einhverja hungurlús til að lifa á.
Þjóðfélag sem kemur svona fram við veikt fólk, er vont þjóðfélag. Eða öllu heldur ógeðslegt þjóðfélag. Þjóðfélag sem gefur ríkum mönnum tækifæri til að græða ennþá meira og gefur þeim auðlindirnar á meðan veikt fólk og fátækt á ekki ofan í sig að éta, er vont þjóðfélag. Eða öllu heldur ógeðslegt þjóðfélag. Og ég vil svo sannarlega taka þátt í að breyta því.
